Чехиядағы автосалондардың бірі Škoda Felicia автокөлігін сатуға қойды. Биыл қыркүйекте 22 жасқа толатын хэтчбекті жаңа деуге де болады. Машинаның одометрі небәрі 14.1 мың шақырымды көрсетіп тұр, оның 8 мыңын алғашқы иесі 2010 жылға дейін жүріп өткен.
Хабарландыруда көліктің мінсіз жағдайда екені, түпнұсқа құжаттары мен зауыттан шыққандағы дөңгелектері сақталғаны жазылыпты. «Фелицияға» 68 ат күші мен 106 Нм беретін 1.3 литрлік 8 клапанды бензинді мотор орнатылған, момент 5 сатылы механика арқылы алдыңғы дөңгелектерге беріледі.
Машина бір миллион Чехия кронына бағаланып отыр, бұл мөлшермен 46 мың долларға тең. Айта кетерлігі, Škoda Felicia Қазақстанда әлі де бар. Kolesa.kz-те модельдің 1995-1999 жылдары шыққан 9 данасы 350 мыңнан 1.5 млн теңге аралығында сатылып жатыр.
Škoda Felicia 1994 жылы Favorit моделінің ізбасары ретінде жарық көрді. Машина 2001 жылға дейін хетчбэк, универсал және пикап түрінде шығарылды. Содан кейін Felicia-ның орнын «Фабияның» бірінші буыны басты. Модельдің жалпы 1.4 млн данасы шыққан.
Комментариев: 0