Конвейер жүргізушінің орнын баса ма?

Халқы ұзақ өмір сүретін әрі туу көрсеткіші төмен Жапонияда еңбекке жарамды адам азайып, демографиялық проблема туындап отыр. 2030 жылға қарай жүк тасымалымен айналысатын жүргізуші тапшылығы 36 %-ға жетеді.

Мұндай мәселені өзге елдің логистикалық компаниялары «С» санатындағы жүргізуші куәлігі бар гастарбайтерлерді жұмысқа алу немесе автопилоты бар жүк көліктерін жолға шығару арқылы шешеді, ал жапондар басқа амал ойлап тапты.

Жапонияның Жер, инфрақұрылым, көлік және туризм министрлігі Токио мен Осака арасында жабық транспорт магистралін салу жоспарын ұсынды, жобаның екі нұсқасы бар. Біріншісі — негізгі жол бойымен (жолақтар арасына немесе астына) көптеген бөлікке бөлінген конвейер лентасын жүргізіп, соның бойымен тауар тасу. Екінші әдіс — туннель ішімен электрлі жүк арбасын жүргізу.

Идея қарапайым әрі тың бастама емес, бірақ өте ауқымды. Бағыттың ұзындығы 500 километрден асады, құрылысқа 3.7 триллион иен (~23 млрд доллар) жұмсау қажет деп хабарлады Japan News. Егер Autoflow Road транспорт жүйесі жүзеге асса, күніне 25 мың жүргізушінің жұмысын тындыра алады.