«Автостат» агенттігі КСРО тұсындағы автомобиль саны мен халықтың көлікпен қамтамасыз етілу деңгейі туралы статистикалық мәлімет ұсынды. 1991 жылы елде 16,9 миллион жеңіл автомобиль болған. Мұны 1000 адамға шаққанда 59 автомобильден келетін.
Балтық бойы елдерінде халықтың моторизациясы ең жоғары деңгейде болды. Атап айтқанда, Эстонияда 1000 адамға 138, ал Литвада — 122 автомобиль. Қарапайым тілмен айтқанда, әрбір жетінші эстон мен әрбір сегізінші литвалықта автокөлік болған. Бұл көрсеткіш Грузия (96), Армения (91) және Латвия (89) елдерінде де айтарлықтай жоғары еді.
Ал ең төменгі көрсеткіш Молдова, Өзбекстан және Тәжікстанда-тұғын. Бұл елдерде 1000 тұрғынға 40 көліктен келді. Жалпы одақтағы көліктің тең жартысынан астамы — 8,9 миллион автомобиль Ресейде тіркелген. Бұл елде 1000 адамға шаққанда 60 автомобиль бар болатын. Қазақстанда 800 мың көлік болды, басқаша айтқанда, 1000 адамға 48 автомобильден келді.
Тәуелсіздіктің үшінші он жылдығындағы есеп бойынша бұрынғы кеңестік республикалардың моторизация деңгейі айтарлықтай өзгерді. Бұл азаматтардың өмір сүру деңгейіне және кірісіне тікелей байланысты екені түсінікті. Қазіргі уақытта Қазақстанда әрбір бесінші адамның жеке көлігі бар. Еліміздегі жалпы жеңіл көлік саны — 3,6 миллион. Ал Ресейде әрбір үшінші адамның автокөлігі бар.
Бірақ мәселе автомобильдердің санында емес, сапасында болып тұр. Қазақстанда көне көліктер қаптап жүр. Егер осыдан бес жыл бұрын елдегі 10 жастан асқан көліктер үлесі 59 % болса, жақында бұл көрсеткіш 65 %-ға дейін өскен.
Комментариев: 0