Бұл жөнінде сөз қозғауымызға маусым айының басында көрсетілген Skoda Karoq Velo псевдоконцептісі түрткі болды. Шағын кіржуғыш машинамен және қолжуғышпен жабдықталған бұл көліктің пайда болуына британиялық велосипедшілер арасында жүргізілген сауалнама нәтижесі себеп болыпты. Сауалнамаға қатысқан мың жарымға жуық адам велосипедпен сапарлауға арналған автокөліктен не көргісі келетінін айтқан. Шайтанарбаны тасуға ыңғайлы бекіткіштер сынды әдеттегі тілектерден бөлек, тізімнен кіржуғыш машина сынды оғаштау дүниелер де табылды, оны қатысушылардың 27 %-ы қалаған.
Көлікте отырып-ақ қол жуу мүмкіндігі көптеген жүргізушілердің назарын аударатыны анық, десе де мұндай қарапайым құрылғының орнатылуы техникалық жағынан өндіруші компаниялар үшін тиімді болмай отыр. Сол себепті тазалыққа аса мән беретіндердің өз бетінше әрекет етуіне тура келеді. Сондай жандардың бірі Nissan Patrol көлігіне шағын қолжуғыш орнатып алыпты. Ресейлік шебер жүргізуші есігіндегі кең қалтаға кішкентай газдық жуғышты моторымен бірге жайғастырған. Су тұтқа астындағы белсенді батырманың көмегімен беріледі, ал бүріккіш дәл сол қалтаның төмен жағына қойылған.
Автокөліктегі жеке гигиена саласындағы басымдылық немістерге, дәлірек айтсақ Horch компаниясына тиесілі. 1939 жылға тән үлгідегі аэродинамикалық шанаққа ие 930 S лимузинінің алдыңғы оң жақ қанатына шұңғылшасы бар қолжуғыш орнатылған.
Автокөліктегі қолжуғышты тек күннің жылы кезінде ғана қолдануға болады, себебі қыста су қатып, ол мәселені шешу үшін біраз әуре-сарсаңға түсуге тура келеді. Өйткені қатпайтын улы сұйықтықпен қол жумайсыз ғой…
Комментариев: 0