Көлік көрмесіне қызығатындар азайып барады

Екі-үш жыл бұрын күллі әлемді жайлаған пандемия қалыпты тіршілікті түбегейлі өзгертіп, жұрт көрісуден қалған еді. Уақыт өте бұған да ет үйренсе керек, мұндай шараларға қызығатын халық қатары сиреді. Ал одан ертерек автосалонға қатысуға ниетті брендтер біршама азайғаны байқалды.

Carscoops порталы суперкар өндіретін танымал компаниялардың біріндегі маркетинг бөлімі басшысының миллион долларға машина тұратын стенд орнатып, бір аптадан кейін оны қайта бұзып әуре болғанша, сол ақшаны көп адам көретін керемет бейнеролик түсіруге жұмсаған әлдеқайда тиімді деген сөзін мысал етіп жазды.

2024 жылы ақпанның аяғы мен наурыздың басында өтетін Женевадағы автосалонға неміс автоөндірушілері мүлде қатыспайды екен. Automobilwoche таратқан мәлімет бойынша Швейцарияда есік ашатын көрмеде BMW да, Mercedes-Benz те, Volkswagen мен Audi де төбе көрсетпейді. Škoda, Cupra және Porsche ойланып жатқан көрінеді, алайда олардың келісе қоюы екіталай. Stellantis Лас-Вегаста өтетін CES көрмесіне барудан бас тартқанын ескерсек, Женевадан да көп брендті көре алмауымыз мүмкін.

Алпауыт компаниялардың бұл әрекеті ұйымдастырушыларға ұнамайтыны анық. Өйткені Женева-2024 мерейтоймен байланысты шара. Автосалон келер жылы 100 жылдығын атап өтуге тиіс. Бірақ бұл барлық стенд бос қалады дегенді білдірмейді, көрме өкілдері Еуропа нарығына шығу үшін жан салып жатқан Қытай концерндерімен келіссөз жүргізіп жатыр.