Kolesa.kz редакциясына оқырмандардың бірі мынадай сұрақпен жүгінді:
«Кеше мен көлік сатып алдым, бұрынғы иесі оны техникалық тексерістен өткізген. Бірақ қайта рәсімдегеннен кейін құжаттың күші жойылды. Біз техбайқау станциясына барғанда, ол жақтағылар 1 қаңтардан бастап техникалық тексеріс қайта жазылмайтынын айтып, көліктің жаңа иесі, жаңа нөмірлері бар, тексерістен қайта өтіңіз деді. Бірақ себебін түсіндіре алмады. Кеше ХҚКО-нда болдым, бүкіл жүргізушілер мұның себебін түсінбей дал болуда. Техникалық тексеріс станциясындағы мамандар: „біз базада ештеңе өзгерте алмаймыз, бланкіге мөр басып бере аламыз, бірақ базада бәрібір техникалық тексеріс болмайды. „Сергек“ техникалық тексеріссіз жүргеніңізді тіркейді. жол полициясы да тексеру барысында мұны есіңізге салады“, — деді. Мен ғаламторды сан мәрте ақтарып, тиісті мекемелердің барлығына хабарластым, алайда нақты түсінік берген бір жан жоқ. Ешкім ештеңе білмейді. Мәселенің неде екенін түсіндіріңіздерші!»
Расымен де заңға түзетулер енгізілді, бірақ олар қаңтардан емес, 2019 жылдың тамызынан бастап күшіне енді және түзетулер тек техникалық тексерістің бас операторы мен станцияларға орнатылатын бағдарламалық жасақтамаға қатысты. Техникалық байқау тәртібі, көлікті жаңа иесінің атына рәсімдеу және әрекет ету мерзімі өзгеріссіз қалды.
Неліктен қайта рәсімдемейді? Мұнымен кім айналысуы тиіс?
Станция қызметкерлерінің ТББАЖ (Техникалық байқаудың бірыңғай ақпараттық жүйесі) деректер базасына өзгерістер енгізуге құқығы жоқ. Олар тек көліктің жаңа құжаттары мен иесіне қайта техбайқау өткізіп бере алады. Негізі техбайқауды жөнелту міндеті полицейлердің мойнында. Автокөлік жаңа иесінің атына қайта рәсімделгенде оған жаңа КҚТК (техникалық құжат) мен мемлекеттік нөмір беріледі.
Заңға сілтеме:
Механикалық көлiк құралдарын және олардың тiркемелерiн мiндеттi техникалық қарап-тексеруді ұйымдастыру және жүргiзу қағидаларын, механикалық көлiк құралдарын және олардың тiркемелерiн мiндеттi техникалық қарап-тексеруден өткiзудің кезеңдiлiгiн бекiту туралы" ҚР ИИДМ бекіткен және қазіргі таңда қолданыстағы ережелердің 50-тармағына сәйкес, «Көлiк құралының меншiк иесi және (немесе) мемлекеттiк тiркеу нөмiрлiк белгiсi өзгерген жағдайда көлiк құралын тiркеу орны бойынша жол жүрісі қауіпсіздігін қамтамасыз ету жөніндегі уәкілетті органның аумақтық бөлімшелері көлiк құралын мемлекеттiк тiркеу туралы жаңа куәлікті және (немесе) мемлекеттiк тiркеу нөмiрлiк белгiсiн беру кезiнде диагностикалық картаға және мiндеттi техникалық қарап тексерудің бiрыңғай ақпараттық жүйесiне тиiстi өзгерiстердi енгiзудi жүргiзедi».
Көлік иесі ауысқанда құжаттарды қабылдау мен беру мамандандырылған ХҚКО-нда өтетініне қарамастан, ІІМ-нің тіркеу функциясын ешкім тартып алған жоқ. Погон таққан қызметкерлер бұрынғыдай көлік тіркеумен айналысады, бірақ ХҚКО-нда емес, өз кабинеттерінде. Желі арқылы өтінім қабылдап, көліктің «ұрланғандар» тізімінде бар-жоғын тексереді де, жаңа КҚТК, мемлекеттік нөмір рәсімдеп, техникалық байқаудың бірыңғай базасына өзгерістер енгізеді.
Онда неге техбайқауды көліктің жаңа иесіне ауыстырмады?
Бұл сұрақты тек жергілікті полицейлерге қойған жөн. Біздің байқағанымыздай, тамыз айында бұл мәселеге көп жүргізушілер тап болған, демек бір кілтипан, не болмаса Қазақстанда жиі кездесетін адами фактор бар.
Техбайқауды көліктің жаңа иесінің атына қайта рәсімдегенін қалай білуге болады?
Техбайқау туралы eisto.kz сайтынан біле аласыз. Ол үшін жәй ғана тіркелу жеткілікті. Айтпақшы, бұл ресурста автокөлік иелерінің техникалық байқауды өз бетінше қайта тіркеу мүмкіндігі бар.
Бірақ бұл жағдайда басқа мәселе туындайды — сайт браузерлерде (қауіпсіздік сертификатына қатысты қиындықтар бар) ашылмайды не өз деректеріңізбен кіруге мүмкіндік бермейді. Жергілікті форумдарда жүргізушілер тарапынан дәл тамыз айында жазылған негативті хаттар көп. Әзірлеушілер берген кеңес бойынша, сайттан ақау табылған жағдайда 1414 нөміріне хабарласу керек.
Кеңес: автокөліктің техникалық тексерістен өткен-өтпегенін қайта рәсімдей салысымен тексеріңіз. Мамандандырылған ХҚКО-нан техбайқаусыз шыққан жүргізуші 5 АЕК (12 625 теңге) айыппұл арқалап, көлігі айып тұрағына жіберілуі мүмкін.
Базада көліктің техникалық тексерістен өткені туралы ақпарат дұрыс берілмеуі мүмкін. Бір жыл ішінде оның өздігінен өзгеруі де ғажап емес. Бұған мына бір жағдай мысал бола алады: 2018 жылдың желтоқсанында өткен техникалық байқау маусымға дейін, яғни жарты жылға қысқарып қалған. Бұл тек қыркүйекте анықталды, десе де базада тексерістен өткен күн дұрыс белгіленген.
Тағы бір кеңес: өзіңізбен бірге қағазға басылған диагноситкалық картаны алып жүріңіз, осылайша техбайқаудан өткеніңізді полицейлерге дәлелдей аласыз. Қолданыстағы техбайқауды eisto.kz сайтында тексеріңіз. Тағы бір ақаудың пайда болмасына кім кепіл?
Түйін
- Автокөлік иелері үшін техбайқау тәртібі өзгерген жоқ.
- Көлікті қайта тіркеу барысында оның жаңа иесін ТББАЖ базасына ІІМ-нің қызметкерлері енгізеді.
- Көлік иесі ауысқан кезде техникалық тексерістен қайта өтудің қажеті жоқ. Тек оның жарамдылық мерзімі өткенде ғана барасыз.
- Станциядағы операторлар ТББАЖ базасына өзгеріс енгізбейді.
- ТББАЖ базасында көлік иесін eisto.kz арқылы ауыстыруға болады.
- Қазақстанда техникалық тексеріс шарттылықтан арылар емес, әрі жергілікті ақпараттық технологиялардың жиі істен шығатыны да көңіл көншітпейді.
- Диагностикалық картаны өзіңізбен алып жүргеніңіз жөн.
Сәтті сапар тілейміз!
Комментариев: 0