1987 жылы BMW Франкфурт автосалонында Z сериялы алғашқы автокөлікті таныстырды. Z1 деп аталатын модель 1991 жылға дейін шығарылған. Жалпы таралымы небәрі 8 000 дана. Солардың бірі (1990 жылы жасалған) Kolesa.kz сайтында сатылып жатыр.
Z1 әлі де шанағының дизайнымен назар аудартады, барлық панельдері термопластик немесе композитті материалдан жасалған. Родстердің сырт пішініндегі басты ерекшелік — табалдырық ішіне жасырылған есіктер.
Капот астына шамамен 170 ат күші бар 2.5 литрлік M20B25 моторы орнатылған. Айналу моменті артқы дөңгелектерге 5 сатылы механикалық қорап арқылы беріледі. Z1 — BMW-ның артына көп иінтіректі аспа орнатылған алғашқы модельдерінің бірі. Алдыңғы жағына E30-дағы секілді MacPherson тіреуі қойылған.
Алматылық Z1-дің иесі көлік туралы көп мәлімет бермепті. Тек машинаның жағдайы жақсы екенін, одометрі небәрі 40 000 шақырымды көрсетіп тұрғанын айтады. Фотосуреттерден автомобильдің жақсы сақталғаны байқалады. Салонда аздаған сызаттар бар, модельдің бұрынғы үш шабақты рөлінің орнына Momo рөлі қойылған.
BMW Z1 32 миллион теңгеге (63 мың еуро) бағаланып отыр. Еуропада Z1 жағдайына қарай 37-89 мың еуро аралығында сатылады.
Комментариев: 0