Испанияда 1987 жылғы Opel Kadett саудаға түседі. Бұл қарапайым хетчбэк емес, әйгілі Koenig Specials GmbH тюнерлерінің қолы тиген модель.
Автомобильдің қай марка өкілі екенін алдынан ғана танисыз, ал артқы бөлігі Ferrari Testarossa стилінде жасалып, спойлер, басқа оптика және жалпақ дөңгелек орнатылған.
Салонда да өзгеріс жетерлік. Ең алдымен басқа рөл мен былғарымен қапталған спорттық орындықтар көзге түседі. Мультимедиа жүйесін де біршама түрлендірген.
Шеберлер Opel Kadett-тің күштік құрылымына тиіспепті. Хетчбэк 158 ат күшіне ие 2 литрлік 16 клапанды мотормен жүреді. Агрегат 203 Нм моментті алдыңғы дөңгелектерге беретін механикалық қораппен жұмыс істейді.
Одометрі 177 170 шақырым көрсетіп тұр. Демек машина гаражда қаңтарылып тұрмаған. 35 жылда «опельге» үш адам иелік етті. Алғаш сатып алған жүргізуші оны досына сатып, 2017 жылы өзі қайта алған екен. Ал қазіргі иесі 2020 жылдан бері тізгіндеп келеді. Хабарландыру авторы көліктің жағдайы өте жақсы деп жазыпты, бірақ фотосынан салонында аз-көп ақау бары байқалады.
Ерекше Kadett 2 маусымға дейін бәссаудаға қатысады. Аукцион бағалаушыларының болжауынша машина 25-27.4 мың долларға сатылуы мүмкін.
Комментариев: 0