Kia Seltos-тың жаңа буынын дайындап жатыр

Компания екінші буындағы Seltos-тың алғашқы суреттерін жариялады. Жаһандық модель ірі Telluride тәрізді дизайн алады. Бренд X-Line және GT-Line модификацияларын ұсынады. Жаңа өнімнің тұсаукесері бір аптадан кейін өтеді.

«Селтостың» сырт келбетінде сұсты сипат пен жаңа электромобильдерге тән аэродинамика үйлескен. Соңғысы ішке кіріп тұратын есік тұтқасынан байқалады. Суреттерден Seltos қырлы шанақ, тік радиатор торы және брендтің қазіргі стиліне сай жаңа жарық техникасын алатынын көруге болады. Марка тік күндізгі жүріс шамы мен артқы шамдарын көрсетті. Автомобильдің пішіні аккумуляторлы EV5-ті еске салады, өйткені төбе сызығы мен артқы тірек осындай әсер береді.

Жаңарған модель заманауи әрі жоғары технологиялы көрінеді. Оны жаңа медиасервистері бар цифрлық интерьерден және жүргізуші ассистенттерінің кең жинағынан байқайсыз. Kia Seltos гибрид күштік құрылыммен жабдықталуы мүмкін. Дегенмен кроссовердің мотор гаммасында шағын дәстүрлі моторлар қалады.

Қазір сатылып жатқан Seltos алты жыл бұрын шыққан. Дилерлер 149 ат күшіне ие 2 литрлік мотормен және вариатормен жүретін алдыңғы не толық жетекті нұсқасын саудалайды. 2022 жылы модель рестайлингтен өтті. Қазір ресми нарықта төрт комплектациясы бар, бағасы 13 990 000–17 690 000 теңге аралығында. Жеке импорттаушылар Қытайдан KX3 деген түрін әкеледі, оның құны 11 млн теңгеден басталады.