Маусымда 11 099 жеңіл және коммерциялық машина, 926 жүк көлігі мен автобус сатылды. Бұл 2021 жылғы ең жақсы көрсеткіш. Ал 2020 жылғы осы аймен салыстырғанда 21.18 %-ға жоғары.
Мамырда ең көп сатылған бюджеттік седан Chevrolet Nexia (1721) жаздың алғашқы айында да ешкімге дес бермеді. Ал екінші орындағы Chevrolet Cobalt (1025) одан едәуір артта қалды. Үшінші сатыда Hyundai Accent (855) тұр. Ал төртінші және бесінші қатарға Kia Rio (741) мен Toyota Camry (563) жайғасты.
Екі моделі үздік үштікке енген Chevrolet-нің (3040) ең көп саудаланған маркалар тізімінде көш бастайтыны анық еді. Бұл рейтингте екінші орынға Hyundai (1948), үшінші орынға Kia (1468) ие болды. ҚАБА мәліметіне сенсек, бұл Kia-ның соңғы бес жылдағы ең үздік көрсеткіші екен.
2021 жылғы маусым қорытындысы бойынша жаңа көліктер нарығындағы үздік 10 марка
| Орын | Марка | 2021 жылғы маусымдағы сатылым (дана) |
| 1 | Chevrolet | 3040 |
| 2 | Hyundai | 1948 |
| 3 | Kia | 1468 |
| 4 | Toyota | 1389 |
| 5 | Lada | 1030 |
| 6 | Volkswagen | 464 |
| 7 | Renault | 321 |
| 8 | Nissan | 301 |
| 9 | Subaru | 230 |
| 10 | JAC | 219 |
2021 жылдың алғашқы алты айында автосалондар 56 418 көлік сатты. Бұл 2020 жылмен салыстырғанда 55.8 %-ға жоғары көрсеткіш. Бірінші жарты жылдықта Chevrolet өнімдеріне сұраныс жоғары болды. Қаңтардан маусымға дейін Қостанайда құрастырылған 14 754 машина иесін тапты. Екінші орындағы Hyundai (12 238) көшбасшыдан сәл артта қалды. Ал үздік үштікті Toyota түйіндеп тұр. Жапониялық брендтің 6979 данасы ғана сатылды.
Жиынтық түрлерінің бағасы мен сипаттамасы Kolesa.kz мобильді қосымшасындағы «Салонда тұрған жаңа автокөліктер» бөлімінде қолжетімді, оларды салыстыруға болады.
Комментариев: 0