Kia K8 Қазақстанда жасалады

Жергілікті базада GL3 индексті Kia K8 седанына тиесілі құжат пайда болды. Автомобильді «СарыарқаАвтоПром» мамандары құрастырады. Сертфикатта оны қалай өндіретіні жазылмаған, бірақ ірі торапты әдіс қолданатын шығар.

1 / 8

• 
• 
• 
• 
• 
• 
• 
• 

1 / 8

K8 моделі бренд топтамасына 2021 жылы қосылған. Ол Cadenza атауымен де танымал төрт есікті K7-нің орнын басты. Hyundai Grandeur-мен бір платформаны бөлісетін машина 177 ат күшіне ие 1.6 литрлік турбмотормен және 198 ат күшін беретін 2.5 литрлік атмосфералы агрегатпен немесе бойында 300 арғымақтың күші бар 3.5 литрлік V6-мен жүреді. Өз отанында K8-дің гибрид және газбен жүретін түрі сатылады.

Салонында бүтін ойыс панельде орналасқан көлемі бірдей (12.3 дюйм) аспаптар панелі мен мультимедиа дисплейі тұр. Одан бөлек алдыңғы әйнекке түсетін проекция, 14 динамиктен тұратын Meridian аудиожүйесі, Ergo Motion Seat орындығы бар. Бұл кресло көлік жылдамдығы сағатына 130 шақырымнан асқанда денеге тығыз жанасып тұратын жастықша бұдырларын баптайтын жеті пневмокамерамен жабдықталған. K8 өзінің беделін айқындайтын басқа опциялардан да кенде емес.

1 / 4

• 
• 
• 
• 

1 / 4

Құжатта біздің елде шығатын модельге тек 3.5 литрлік G6DT-5 моторын орнататыны жазылған. Қуаты 300 ат күшіне тең (359 Нм) автомобиль алдыңғы дөңгелектерді ғана айналдыратын 8 сатылы автоматпен жұмыс істейді. Қызығы, құжатта қате бар. 67-тармақта қозғалтқыш қатарлы конфигурацияға ие, төрт цилиндрлі деп көрсеткен. Іс жүзінде капот астында V6 тұрады.

Қазақстан K8 құрастыратын үшінші ел екенін атап өткен жөн. Оңтүстік Кореядан бөлек, автомобиль былтырдан бері Өзбекстандағы зауыттан шығып жатыр.

Kia K8-ді автосалондарға қашан жөнелтетіні белгісіз. Марка өкілдері ресми мәлімдеме жасаған жоқ, дегенмен, бұған бірнеше ай кететіні анық.