Kia EV9-дың қуатты нұсқасы 2025 жылы шығады

Kia-ның Инвестор күні аясында EV9 электрокроссоверінің GT индексті қуатты нұсқасы жайлы ақпарат шықты. Ол 2025 жылы қаңтарда жарық көреді.

Қос моторлы қуатты күштік құрылымының арқасында машина алғашқы жүздікті небәрі 4 секундта еңсереді, ал қазіргі EV9 GT Line нұсқасының көрсеткіші — 5.3 секунд. Сондай-ақ кроссовер спорттық аспа және күшті тежеуішпен мақтанады.

Марка тұсаукесер кезінде жаңа батарея туралы ештеңе айтпады, сондықтан электромотордың қуаты артқанда кроссовердің жүріс қоры азаяды деп болжауға болады, әдеттегі EV9-дың жүріс қоры — шамамен 500 шақырым.

Қазір Kia-ның қуатты электромобильдер топтамасында EV6 GT ғана бар, 2025 жылы бұл қатарға EV9 GT және EV5 GT кроссовері қосылады. Соңғысының дизайнын Қытай Өнеркәсіп министрлігі сәуірде көрсеткен. Сондай-ақ Kia 2024 жылдың үшінші тоқсанында EV3 концептісінің сериялы нұсқасын таныстырады.