Желіде рестайлингтен өткен Kia Carnival-дың суреті тарады. Бұл ресми тұсаукесерге дайындаған суреттер болса керек. Корей инсайдерлерінің мәліметіне сүйенсек, сырт пішіні жақсарған минивэнге Kia Sorento-ның моторын орнатады.
Рестайлингтен өткен Kia Carnival-дың алдыңғы бөлігінде басқа радиатор торы, бампер және шам тұр. Г тәрізді жүріс шамы туыстас Kia модельдерін, әсіресе, EV9 электрокроссоверін еске түсіреді.
Артқы бөлігінде жарық жолағымен біріккен шам және өзгерген бампер көзге түседі. Жүксалғыш қақпағындағы спойлер мен шанақтың артқы тіректері де өзгерген сияқты.
Автомобильдің салонында өзгеріс бола ма, жоқ па, белгісіз. Десе де инсайдерлер мотор гаммасы Sorento-ға орнатқан гибрид күштік құрылыммен толығады деп мәлімдеді. Ол 1.6 литрлік турбомотор мен электрлі қозғалтқыштан (230 а.к.) тұрады. Жабдықтар тізіміне проекциялық дисплей және жаңа жүргізуші ассистентінің толық жинағы секілді опциялар қосылады.
Бірнеше аптада өз елінде шығатын жаңарған минивэнді бренд 2024 жылдың басында Америка халқына таныстырады. Қазақстанға автомат қораппен жұптасқан 3.5 литрлік бензинді моторы бар Kia Carnival келеді. Автомобиль алдыңғы жетекті. Бағасы — 20-27.5 млн теңге.
Комментариев: 0