Кез келген нөмірді тапсырыс беріп алуға болады. Бағасы мен мерзімі нақтыланды

Биыл шілдеде мемлекет басшысы жаңа Салық кодексіне қол қойды, ондағы нормалардың көбі 2026 жылдың 1 қаңтарында күшіне енеді. Елдегі басты қаржы құжатының біріндегі өзгеріс — кез келген нөмірді дайындау үшін сұралатын мемлекеттік бажды (VIP сандарды есептемегенде) бекіту.

Қанша тұрады

Салық кодексінің 667-бабына сәйкес баж мөлшері 10 АЕК болады. Келер жылы 1 АЕК 4325 теңгеге жететінін ескерсек, жеке нөмірге тапсырыс беру үшін 43 250 теңге төлеуге тура келеді.

Кәсіпорын қашан нөмір жасай бастайды

Ақпараттық-өндірістік орталық Kolesa.kz редакциясына қазір осы жобаны жүзеге асыруға дайындалып жатқанын хабарлады. Зауыттарға қосымша жабдық орнатып, процесті реттеп жатыр. Компания филиалдары 2026 жылдың 5 қаңтарынан бастап өтінім қабылдап, нөмір дайындайды.

Қалай тапсырыс беруге болады және қанша күту керек

Алғашқы кезеңде тұрғындар арнайы ХҚКО-да көлікті тіркеген кезде өтінім береді. Болашақта бұл қызмет онлайн форматта қолжетімді болады. Процесті цифрландырумен «Ұлттық ақпараттық технологиялар» АҚ айналысады.

Әзірге Астана мен Алматыда нөмірді дайындауға 5 жұмыс күні, облыс орталықтары мен Шымкентте 15 жұмыс күні кетеді деген болжам бар. Дегенмен техпаспорт пен нөмір жасау тәртібін бекітетін ІІМ бұйрығына өзгеріс енеді, сондықтан мерзім өзгеруі мүмкін.