Карлос Гон «Ниссаннан» миллиард доллар талап етті

Мәселені уақытылы шешпесе, ол бір күні шиеленісіп кетеді. Renault концернін, кейін Mitsubishi альянсына қосылған Renault — Nissan бірлестігін басқарған Карлос Гонның басынан өткен оқиға осының дәлелі болды.

Карлос Гонды 2018 жылы салық төлеуден жалтарғаны үшін Жапонияның заң қызметкерлері тұтқындаған. Тергеу нәтижесі бойынша бұрынғы бастық 2010-2018 жылдары 9 млрд иен (сол кездегі бағам бойынша 80 млн доллар) табысын жасырып қалған. Кейін Гонның адвокаттары оны үйқамаққа шығарып алды, 2019 жылы ол жеке ұшағымен Түркияға, одан Ливанға қашып кетеді. Күдікті әлі күнге дейін сол елде жасырынып жүр және кінәсіз екенін айтудан шаршамайды. Соттан қашып кеткен азаматқа көп ұзамай халықаралық іздеу жарияланды.

Іс жабылды деген болса керек, Жапонияның құқық қорғау органдары сотталушыны елге қайтаруға бағытталған әрекетін тоқтатты. Бұлары бекер болған екен. Bloomberg басылымы биыл мамырдың аяғында Гон Nissan компаниясы беделіме нұқсан келтірді деп Ливан сотына арыз түсіргенін хабарлады.

Карлос Гон 1 млрд доллар өтемақы талап етіп отыр. Арызда ол өзін Nissan директоры қызметінен босатуға, автоконцерндегі үлесін тәркілеуге және оны түрмеге жабуға қатысы бар деп санаған Nissan компаниясындағы бірнеше менеджердің атын жазыпты.

Nissan ешқандай арыз алмағанын және оның мазмұнымен таныс емес екенін мәлімдеді. Мұндай жағдайда қарсы тарапқа арыз жазу ең дұрыс шешім болатын сияқты. Таяу Шығысқа арнайы жасақ жібермейтіні анық.