Канадада бір топ ұрланған көлік табылды

Өткен апта Канаданың Шекара қызметі агенттігі мен Онтарио провинциясының полициясы «Проект Вектор» деп аталатын операция өткізіп, Монреаль портында 2023 жылғы желтоқсаннан 2024 жылғы наурызға дейін ұрланған 598 автомобильді анықтады.

Олар 390 жүк контейнеріне тиеліпті, қолды болған көліктердің 483-і Онтариодан, 115-і Квебектен екен. Олардың жалпы құны 35 млн Канада долларынан асады. Канадада әрбір бес минут сайын бір машина ұрланатынын ескерсек, табылған көліктер теңіздің жанындағы тамшыдай ғана деп жазды The Gazette.

Әдетте ұрылар автомобильді үш түрлі жолмен қолды етеді: көлік иесінің қолындағы кілттің радиосигналына ие болады, жаңа кілтті бағдарламалайды немесе арнайы құрылғыны машинаның борттық компьютеріне қосады. Бұған қажетті құрал-жабдық интернетте заңды түрде сатылып жатыр.

Ұйымдасқан қылмыстың топқа төтеп бере алмаған Канада билігі тұрғындарға жеке көлігінің қауіпсіздігін қадағалауды ұсынып отыр. Мысалы, машинаны гаражға немесе жарық жақсы түсетін жерге қою және рөлді құлыпту керек.