Нейтрализатор ұрлығы кейінгі кезде АҚШ-та ғана емес, әлемнің көптеген елінде өзекті мәселеге айналды, бұл қатарда Қазақстан да бар. Осы уақытқа дейін катализатор алуды қиындататын арнайы тор, бөлшекке көлік VIN-кодын жазу сияқты тәсілдер қолдануды ұсынғандар болған, алайда ескерусіз қалып келді.
Енді қылмыспен күреске билік бел шеше кірісті. Калифорния губернаторы ұрының бөтен кісіге тиесілі затты сатуын қиындататын құжатқа қол қойды.
Анықтама ретінде: статистика бойынша соңғы бір-екі жылда АҚШ-та катализатор ұрлығы еселеп өскен. 2019 жылы 3389 жағдай тіркелсе, өткен жылы 65 398 шағым түсіпті.
Бұдан былай катализатор алатындар мен ұсталған автобөлшек сататын дүкендер түскен тауарды міндетті түрде есепке алып, компонент алынған машинаның VIN-коды мен сатушыға қатысты мәліметті жазып отырады. Ақысы тек тексеруге болатын жолмен төленеді, яғни қолма-қол ақшамен есеп айырысуға мүмкіндік жоқ. Талапты орындамаған адам ұсталса, кем дегенде мың доллар айыппұл төлейді, кей кәсіпкер бизнес жүргізу құқығынан да айырылуы мүмкін.
Калифорнияда оңай жолмен ақша табуды көздегендердің жағдайы сәл қиындағанмен, бөлшекті сыртқа сатуға еш кедергі жоқ. Мұны жергілікті билік те мойындап отыр. Шенділер көрші штаттар осыдан үлгі алып, қатаң шара қолданады деп үміттенеді.
Комментариев: 0