Jeep-тің жағдайы мәз емес

2018 жылы Jeep АҚШ-та 973 227 автомобиль сатқан, ал былтыр 641 166 машина саудалады деп хабарлады Carscoops. 2024 жылдың бірінші жартысында 304 186 көлік иесін тапты, демек биылғы көрсеткіш былтырғыдан төмен болуы мүмкін.

Басылым «джип» саудасының нашарлауына өндіріс топтамасы кеміп, бұрын қолжетімді болған модельдердің күрт қымбаттауы себеп болды деп санайды. Cherokee-дің бағасы екі жылда 28 135-тен 37 695 долларға өсті. Тіпті шағын Renegade 2023 жылы 30 490 долларға бағаланды, яғни ол әлдеқайда ірі Compass-тан қымбат. Салдарынан марка қоймасы сатылмаған машинаға толып қалды.

Оның үстіне Jeep-ке иелік ететін Stellantis консорциумы автомобиль бағасын түсіргісі келмейді, керісінше, марканы Range Rover модельдерімен бір сегментке шығаруды жоспарлап отыр. Сол мақсатта жақында АҚШ-та саудаға түсетін Wagoneer S-тің бағасы 71 995 доллардан басталады.

Jeep 2025 жылдың аяғында нарыққа шығатын Cherokee-дің жаңа буыны және рестайлингтен өткен Compass пен Renegade арқасында жағдай оңалады деп үміттеніп отыр. Бірақ жаңа өнімдер арзандамауы мүмкін.