Jeep пен Hummer гибриді сатылады

Римде 2000 жылғы Женева автосалоны үшін Coggiola шанақ ательесі жасаған сирек кездесетін Hummer H1 T-Rex саудаға шықты, мұндай машинаның бір данасы ғана бар. Дизайны өзгеше әрі көп жүрмеген көлік қаншаға өтетіні қазірше белгісіз. Бірақ он неше жыл бұрын T-Rex тағы бір мәрте саудаға шыққан, ол кездегі бағасы жарты млн еуроға жетті.

Италиялық Carrozzeria Coggiola көптеген танымал автоөндірушімен серіктес болды. Ателье бірнеше рет концепт-кар жасауға атсалысқан. T-Rex компанияның алғашқы жеке жобасы. Мамандар бұл жоба Таяу Шығыстағы «байбатшаларға» ұнайды деп ойлаған. Бірақ үміт ақталмай, алып жол талғамайтын көліктің жалғыз данасы ғана жарық көрді.

1 / 7

• 
• 
• 
• 
• 
• 
• 

1 / 7

T-Rex толық жетекті классикалық Hummer H1 шассиіне негізделген, 4 сатылы автомат қорап және дискілі тежеуіші бар. Жол талғамайтын көлік 195 ат күшіне ие 6.5 литрлік дизельді V8 моторымен жүреді. Жылдамдығы сағатына 135 км-ге жетеді.

Шассиге шыныпластик панельден жасалған жаңа шанақ қойған, алдыңғы бөлігінің дизайны сол кездегі Jeep модельдерін еске салады. Артқы жағында қосымша қондырма бар.

T-Rex-ті жасаған шеберлер үлкен трансмиссия тоннельмен бөлінген төрт түпнұсқа креслоны сақтап қалды. Бірақ артқы жаққа үшінші қатар орындықтарын орнатты. Жол талғамайтын көлік интерьерін түрлендіруге болады.

Салонның алдыңғы бөлігі де өзгерген. Мысалы, жаңа алдыңғы панель мен ортаңғы консоль пайда болды. Салон таза былғары, мата және көк мәрмәрмен әрленген. Сондай-ақ T-Rex-те спутник телефон, навигатор, артқы көрініс камерасы, DVD және интернет сияқты сол кезеңдегі ең заманауи байланыс құралдары болды. Оны Acer компьютерінің борттық жүйесіне біріктірген.

Жолаушыларға жайлы болу үшін сервожетекті басқыш орнатылған. Жол талғамайтын көлік табалдырығы жерден 650 мм биік деген ақпарат бар. Төбеде жарты ай тәрізді мөлдір қосымша тұр. Ол Таяу Шығыстағы тұтынушыларға арналған сияқты.

Hummer T-Rex иелері оны көп пайдаланбапты. Сатушы машина қазірге дейін небәрі 3100 шақырым жол жүргенін айтты.