Ресейде жақында конвейерге тұратын екі «москвичке» арналған көлік құралының типін мақұлдау құжаты жарияланды. Құжат бойынша бізге JS4 атауымен белгілі кроссовер және оның Қытайда E40X индексіне ие электрлі түрленімі жаңа «москвич» болады.
«Москвич» электромобилі «3е» деп аталады (үш е. — Kolesa.kz ескерт.). КҚТМ құжатындағы ақпаратқа сүйенсек, машина 68 ат күшіне ие мотормен (340 Нм) жүреді, жүріс қоры — 410 км. Құжаттағы эскизден «москвич 3e» моделінің сырт пішіні JAC-пен бірдей екені байқалады. Айырмашылық логотипінде ғана шығар.
Бензинді «москвичтің» индексі — 3. Мотор гаммасы тек механикамен жұптасатын 109 ат күшіне (150 Нм) ие 1.6 литрлік атмосфералы қозғалтқыш және 150 күш пен 210 Нм беретін 1.5 литрлік турбомотордан тұрады. Екінші қозғалтқыш вариатормен де жұмыс істейді. «Москвич 3» моделінің екінші күштік құрылымы Қазақстанда сатылатын JAC JS4-тен қуатты екен, біздің елдегі 1.5 литрлік мотор 136 ат күшіне ие.
«Москвич 3» моделіне негіз болған қытайлық машина Қазақстанда JAC JS4 деп аталады. Кроссовер біздің елде 9.9–12.5 млн теңге тұрады. Көліктің комплектациясы туралы толық ақпаратты Kolesa.kz қосымшасындағы «Жаңа автокөліктер» бөлімінен көруге болады.
JAC жаңа «москвич» болатыны биыл шілденің басында белгілі болды, ол кезде Мәскеу билігі бұрынғы Renault зауытында қандай машина шығатынын көруге барған. Бірақ БАҚ таратқан бұл ақпаратты КАМАЗ баспасөз қызметі жоққа шығарып, қайта жаңғыратын ресейлік маркаға JAC-тың еш қатысы жоқ екенін мәлімдеді.
— Көліктердің көрнекі суреті прототип емес әрі «Москвич» МАЗ шығаратын нақты модельдерге еш қатысы жоқ, — деп хабарлаған.
Комментариев: 0