ҚР ІІМ Әкімшілік полиция комитетінің басшысы Асқар Тәженов бүгін өткен брифингте биыл алғашқы 5 айда мас болып көлік жүргізгені үшін 8.5 мыңнан астам жүргізуші әкімшілік жауапқа тартылғанын хабарлады. Оның айтуынша, полицейлер күніне 70 мас жүргізушіні ұстайды (бірақ 8.5 мың адамды 150 күнге бөлсеңіз, 56.6 шығады). Сонымен қатар 2020 жылы Қазақстанда 21.4 мың жүргізуші көлік құралын ішімдік ішіп басқарғаны үшін ұсталды, бұл орта есеппен тәулігіне 57.5 адам деген сөз. 2019 жылы бұл көрсеткіш — 60-тан сәл жоғары болған.
Мас жүргізушілер себепші болған жол апатының саны азайды. ҚР БП Құқықтық статистика және арнайы есепке алу жөніндегі комитетінің мәліметі бойынша, 2019 жылы осындай 705 оқыс оқиға тіркелген (шамамен тәулігіне 1.9). Ал 2020 жылы 597 (тәулігіне 1.63), 2021 жылдың алғашқы бес айында 181 жол-көлік оқиғасы (тәулігіне 1.2) болды.
Демек 2020 жылы ащы судан ұрттап машина жүргізгендерге қатысты заң қатаңдаса да, олардың саны азайған жоқ.
Айта кетейік, Қазақстанда 2020 жылдан бастап мас күйінде көлік тізгіндегендер және рөлді мас адамға бергендер 7 жылға дейін жүргізуші куәлігінен қағылып, 15 тәулікке қамалады. Ал ішіп алып, жеңіл зиян келтірген жол апатын жасаса, 20 тәулікке қамауға алынады және 7 жылға көлік жүргізу құқығынан айырылады. Сонымен қатар мас күйде куәландырудан өтуден бас тартқан жүргізуші 8 жыл көлік тізгіндей алмайды және 15 тәулікке қамауға алынады.
Комментариев: 0