Hyundai үш жыл бұрын саудаға шыққан Ioniq 5 кроссоверін рестайлингтен өткізді. Модельдің сырт пішіні аздап өзгеріп, шассиі мен шанағы жақсарды, ал электромобильдің үздік түрленімінде сыйымдылығы үлкен батарея болады. Сондай-ақ Ioniq 5-тің алғаш рет N Line нұсқасы шығады. Машина Оңтүстік Кореяда наурызда саудаға түседі.
Сырт пішініндегі басты өзгеріс — аэродинамикасы жақсы дөңгелек дискісі мен жаңа бампер. Ioniq 5-тің ұзындығы 20 мм артып, 4655 мм-ге жетті. Артқы спойлер 50 мм үлкейді. Интерьер архитектурасы өзгерген жоқ, бірақ салондағы жыбдықтар аздап жаңарды. Мысалы, сымсыз қуаттау орны ауысты, физикалық түймелер блогы пайда болды және жаңа рөл орнатылды.
Мамандар шанақтың капотқа жақын аумағы мен артқы оське күшейткіш материал орнатты. Есік пен ортаңғы тіректі күшейтті. Аспадағы амортизаторды қайта реттеп, артқы электромотор жанындағы дыбыс изоляциясын сақтайтын материалды жақсартты.
Сыйымдылығы 77.4 киловатт батареяның орнын 84 кВт∙сағ аккумулятор басты. Марка машинаның жүріс қоры қалай өзгеретінін жариялаған жоқ, бірақ ол 500 км болады деген болжам бар. Модельдің күштік құрылымы өзгермейді, бұрынғыдай 170, 229 немесе 325 ат күшіне ие мотормен жүреді.
Жабдықтар тізіміне N Line нұсқасы қосылады. Әдетте Hyundai модельдерінің мұндай түрленімі қатты аспамен ерекшеленеді. Өндіруші машинада агрессивті бастырық, 20 дюймдік дөңгелек дискісі және жаңа рөл, бүйірлік тірегі бар кресло, қызыл-қара түске әрленген спорттық салон болатынын хабарлады.
Рестайлингтен өткен Ioniq 5 қазірше өз елінде сатылады, бірақ биыл шетел нарығына, соның ішінде Қазақстанға да шығуы мүмкін. Біздің елде электромобиль бір комплектацияда қолжетімді болады, бағасы — 20 млн теңге.
Комментариев: 0