Hyundai жаңарған Creta-ны сата бастады

Hyundai Үндістанда жаңарған Creta-ны көрсетті. Кроссовер дизайны агрессивті, интерьері заманауи, одан бөлек қозғалтқыш гаммасы кеңейіп, турбомотор қосылды. Жергілікті нарықта бағасы 1 099 900 рупиядан (шамамен 6 млн теңге) басталады. Рестайлингтен кейін көлік 70.5 мыңмтеңгеге қымбаттаған.

Hyundai Creta-ның бейнесі толығымен өзгерді. Дизайнындағы заманауи шешімдер танымал модельге бәсекелстері арасында қаталдау имидж береді. Автомобиль ірі радиатор торымен, қорғаныш пластинаға ұқсайтын үлкен қаптамасы бар бампермен және бірегей диодты оптикамен жабдықталды. Жарықтандыру жүйесі бірнеше деңгейлі, бірақ күндізгі жүріс шамы мен артқы шырақ Hyundai Santa Fe-ні еске салады. Екі жағдайда да көлденең жарық жолақтармен қосылған.

Салондағы жаңа әрлеу материалдары мен ашық түсінен бөлек алдыңғы панелі жаңарды. Реттелетін интерфейсі бар екі 10.25 дюймдік медиаэкран қойған. Климат басқару блогы өзгерді, артқы жақтағы диванда қосымша USB Type C порттары бар.

Creta-да көптеген жаңа опциялар пайда болды. Базалық комплектацияда алты қауіпсіздік жастығы, ал қымбат нұсқада екі аймақты климат-бақылау, айнала шолу камерасы және Bose аудиожүйесі болады. Компания белсенді жүргізуші ассистентінің тізімі айтарлықтай ұлғайып, 19-ға жеткенін хабарлады. Осал жерлері күшейген шанақ құрылымының қауіпсіздігі артты.

Ең арзан Creta бұрынғыдай механикалық қораппен жұптасқан 115 ат күшін беретін 1.5 литрлік бензин немесе дизель мотормен жүреді. Автомат қорабы бар модификацияда бензинді қозғалтқыш вариатормен, дизельді нұсқасы қарапайым автоматпен жұптасқан. Бренд 7 сатылы автоматпен жұмыс істейтін 1.5 литрлік агрегат (160 а.к.) орнатылған модельдің екі қымбат нұсқасын ұсынады. Оның құны 1 999 900 рупиядан (шамамен 11 млн теңге) басталады. Үндістандық Creta-да толық жетек болмайды.

Үндістан кроссовердің жаңа нұсқасы үшін алғашқы нарық болды. Hyundai мұндай Creta басқа елдерге де шығатынын меңзеді. Соңғы жылдары әлемдік автоөндірушілер жаңа модельдерін Үндістанда таныстырып келеді. Дегенмен көлікті басқа елге шығару туралы нақты жоспар әлі айтылмады.