Бұған дейін Hyundai AX1 атауымен белгілі болған биік хэтчбек енді Casper деп аталады. Бұл туралы The Korean Car Blog басылымы Оңтүстік Кореяның интеллектуалды меншік құқығы бюросына сілтеме жасап хабарлады. Айта кетерлігі, Каспер — 1995 жылы шыққан осы аттас фильмдегі кішкентай, мейірімді елестің аты.
Атауынан бөлек жаңа машинаның өлшемі де белгілі болды. Ұзындығы — 3595 мм, ені — 1595 мм, биіктігі — 1575 мм. Демек «Каспер» кішкентай Nissan Juke-тен (4135 мм) тура жарты метр қысқа деген сөз, ол тіпті «Матизден» де (3715 мм) қысқа. Мұндай көлікті тұраққа қою оңай болатыны сөзсіз.
Капот астына Hyundai i10 және Kia Picanto модельдеріне қойылған 1 литрлік үш цилиндрлі бензинді мотор орнатылады. Ол механикалық және робот қораппен жұптасады.
Hyundai Casper қыркүйекте таныстырылып, жыл соңында сатыла бастайды. Модель негізінен Үндістан және өзге де Оңтүстік-шығыс Азия елдеріне арналған. Бірақ басқа аймақтарда да сатылуы мүмкін.
Комментариев: 0