Былтыр наурызда Hyundai бүкіл әлемге H-1 моделінің ізбасары — басқа елдерде Starex деп аталатын Staria-ны көрсетті. Жаңа атауынан бөлек минивэн ерекше футуристік дизайнға ие болған. Үлкен алдыңғы әйнегі, шанақты бойлай орналасқан жарықдиодты жолағы мен ірі радиатор торының екі шетіне қойылған шамдары бірден көзге түседі. Бір жыл өткен соң Staria біздің елге де жетті.
Қазақстанда көліктің бірнеше нұсқасы сатылады. Топтамадағы ең арзан модель — Van. Ұзындығы 5.2 метр болатын фургон 177 ат күші мен 430 Нм момент беретін 2.2 литрлік дизельді турбомотормен, механикалық қорап және алдыңғы жетек жүйесімен жабдықталады. Бағасы — 15.3 млн теңге. Жабдықтар тізімінде төрт қауіпсіздік жастығы, ауа баптағыш, орындық пен айна жылытқыш, дисплейі монохромды қарапайым мультимедиа, реттелетін рөл колонкасы, галогенді оптика және темір дөңгелек дискілері бар.
Жолаушы тасымалдайтын Travel-дің бағасы 17 млн теңгеден басталады. Алдыңғы жетекті машина 8 сатылы автоматпен жұмыс істейтін дизельді мотормен жүреді. Салонда 8 орындық бар, алдыңғы екеуі, рөл, айналар мен әйнек жуғыштың бүріккіші жылынады. Одан бөлек базалық мультимедиа, жарық сезгегі, артқы парктрониктер мен стандарт қауіпсіздік жүйелері орнатылған.
Business жиынтығы 20 млн теңге тұрады. Толық жетекті көлік электронды көмекшілер мен қауіпсіздік жүйелерінің кеңейтілген жинағымен, кілтсіз ашу, климат-бақылау, круиз-бақылау, жүргізуші орындығының электр жетегі, былғары салон, 8 дюймдік экраны бар мультимедиа, сондай-ақ 10.25 дюймдік аспаптар панелі және толық жарықдиодты оптикамен сатылады.
Топтамадағы ең қымбаты — 7 орынды Luxe нұсқасы. Капот астына 249 ат күші мен 331 Нм момент беретін 3.5 литрлік бензинді мотор орнатылған. Жетегі алдында, қорабы 8 сатылы.
Қауіпсіздік жүйелері дәл Business-тегідей, бірақ қауіпсіздік пердешесі және айнала шолатын камералармен толыққан. Жабдықтар тізімінен бірінші және екінші қатардағы орындықтарды жылытқыш, желдету жүйесі, сымсыз қуаттау құрылғысы, ысырмалы есік пен жүксалғыш есігінің электр жетегі, BOSE премум аудиожүйесі, амбиентті салон жарығын және бірнеше USB-порт табасыз. Staria-ның үздік нұсқасын алам десеңіз, 22.6 млн теңге жұмсайсыз.
Комментариев: 0