Hyundai Kona N екі литрлік төрт цилиндрлі бензомотормен жабдықталған. Агрегат 280 ат күші мен 392 Нм момент береді. N Grin Shift режимін қосса, мотордың қуаты 290 «арғымаққа» дейін артады. 8 сатылы робот қораптың ішінде трансмиссияның жақсы майланып, ажыратқыштың тез салқындауына жағдай жасайтын екі электрлі майсорғыш бар.
Launch Control жүйесі максимал жылдамдығы 240 шақырымға жететін көліктің алғашқы жүздікті 5.5 секундта алуына мүмкіндік береді. Eco, Normal, Sport, N және Custom режимдерінің әрқайсысы үшін жеке жұмыс алгоритмі қарастырылған. Инженерлер газ шығару дыбысын реттеу функциясын да ұмыт қалдырмапты.
Машинаға айрықша дизайнда жасалған 19 дюймдік дискілер орнатылған. Салонда бүйірлік тіреуіші жақсартылған орындықтар мен түрлі түсті батырмалары бар рөл көзге түседі.
10 дюймдік экраны бар мультимедиа блогы кроссовер тұрған жердің картасын көрсетіп, айналмадан өту уақытын жазуға қабілетті. Электронды көмекшілер тізімінде бейімді круиз-бақылау, көрінбейтін аймақтарды бақылау жүйелері бар. Цифрлы аспаптар панелі мен проекциялық дисплей барлық нұсқасына орнатылады.
Hyundai Kona N-ның бағасы мен сатылымға қашан шығатыны әзірше белгісіз. Қазақстанға бұл модель келмейді.
Комментариев: 0