Hyundai Creta краш-тесттен өтті

Global NCAP Hyundai Creta-ның SU2 индексті екінші буынының әуселесін байқады. Сынаушылар Үндістан нарығына арналған көлікті таңдапты. Комплектациясы қарапайым модельге небәрі екі қауіпсіздік жастығы орнатылған. Қазақстанда Dynamic және Style нұсқасындағы Creta солай жабдықталады.

Тест кезінде Global NCAP көлікті 64 км/сағ жылдамдықта майысатын кедергіге соғады. Creta бұл сынақта керемет нәтиже көрсете алмады.

Ересектердің қауіпсіздігін сақтау деңгейі мүмкін болатын 17 балдың 8-ін алды. Манекендегі сезгектер кеуде мен аяққа тым қатты күш түсетінін көрсеткен. Сонымен қатар жүргізуші оң тізесін жарақаттап алуы мүмкін. Жолаушының жағдайы тәуірлеу, оның аяғына ғана аздап нұқсан келеді.

Сонымен қатар зерттеушілер үш жастағы балаға ұқсайтын манекеннің жағдайын тексеріп, кеуде тұсын зақымдау қаупі жоғары деген қорытынды жасады.

Нәтижесінде Hyundai Creta бес жұлдыздың үшеуін алды. Бұл тек Hyundai Motor India зауытынан шыққан оң рөлді көліктерге қатысты екенін ұмытпаған жөн. Дегенмен бұл — жаңа модель қатысқан алғашқы сынақ.