Honda кішкентай электрокар шығарады

Honda N-One e: электромобилін таныстырды. Ол идеологиялық тұрғыда Honda e моделінің ізбасары, техникалық жағынан бензинді N-One мен батареялы N-Van e: микрофургонының қоспасы. Жаңа өнім қыркүйекте Жапонияда саудаға түседі, сондай-ақ Honda оны Еуропа нарығына шығарады.

Әзірлеушілер автомобиль дизайны Honda e сияқты әйгілі Honda N360-ты еске салатынын айтты. N-One e: өзгеше жарық техникасы, басқа бампер және радиатор торының орнындағы панельмен ерекшеленеді. Электрокардың өлшемі Жапониядағы кей-карлармен шамалас.

Машина интерьерінің суреті жарияланды. Электрокарда физикалық батырма көп, тіпті трансмиссияны басқару пульті батырма түрінде жасалған. N-One e: моделінің үздік түрленімі 9 дюймдік дисплей орнатқан медиажүйемен жабдықталған, бірақ электрокарда сымсыз қуаттау жүйесі жоқ, смартфон USB-порт арқылы ғана қуатталады. Салонды бірнеше мәрте өзгертуге мүмкіндік бар, машинадан электр қуатын таратуға да жағдай жасалған, токқа электр шәйнек немесе бүкіл үйді қосуға болады.

1 / 7

• 
• 
• 
• 
• 
• 
• 

1 / 7

Көліктің жүріс қоры 270 км-ге жететіні ғана белгілі. Күштік құрылымы N-Van e: моделімен бірдей болады деген ақпарат тарады. Демек машина 29.6 киловатт батареямен бірге жұмыс істейтін 53 немесе 64 ат күшіне ие электромотормен жүреді.

Жапонияда жаңа модельге тапсырыс қабылдау 1 тамызда басталады. Honda электрокарды биыл Еуропаға жеткізген, демек N-One e: марканың осы құрлықтағы модельдік топтамасына қосылады.