Жапониялық компания әлемде алғаш болып автокөліктеріне SAE (Society of Automotive Engineers) классификациясы бойынша үшінші деңгейдегі автономды басқару жүйесін орнатқанын жариялады. Мұның қандай жетістік екенін түсіну үшін Tesla немесе S-класстағы Mercedes-тің автопилоты тек екінші деңгейде екенін атап өту жеткілікті.
Honda Sensing Elite жүйесіндегі шартты автоматика жүргізушіге рөлді басқармауға мүмкіндік береді. Жүргізуші қолын рөлден алып, фильм көріп, тамақ ішіп не смартфонмен хабарлама жаза алады. Бейімді круиз-бақылау және жол белгілерін анықтау жүйесінің көмегімен Honda автопилоты седанды жолақтың ортасында ұстайды. Сонымен қатар өзге көліктермен арақашықтықты сақтай отырып, жылдамдықты үдетеді және тежейді. Honda Sensing Elite аппарат базасында көптеген сыртқы сезбек, сканерлер бар. Көліктің орналасқан жері 3D карта мен жерсерік навигациясы деректері арқылы есептеледі.
Қозғалыс кезінде дыбыстық ескерту немесе қауіпсіздік белдігінің дірілдеуі секілді өзгерістер болса, жүргізуші көлік ішіндегі функцияларды қолдану арқылы жылдам жауап беруі керек. Егер салондағы камера адамның қозғалмағанын анықтаса (ұйықтап қалса), онда электронды ми автомобильді жол шетіне тоқтатады.
Honda Sensing Elite жүйесімен жабдықталған Hybrid EX гибрид нұсқасындағы Honda Legend Жапонияда сатыла бастады. Модельдің үздік нұсқасының бағасы 11 миллион иен (43 миллион теңге). Одан бөлек автокөлікті сатып алу құқығымен ұзақ мерзімге жалға алуға болады.
Комментариев: 0