Haval-дың Қытай нарығына арналған топтамасы жаңа моделмен толығады. CarNewsChina Қытай өнеркәсіп министрлігінің сертификат дерегіне сүйеніп, жаңа өнім H7 индексті болатынын хабарлады. Бренд бұл атауды Қытайда бірнеше жыл бойы пайдаланған жоқ. Кроссовер Xiaolong топтамасының жалғасы болуы мүмкін.
Haval H7-нің өлшемі — 4780×1895×1725 мм, дөңгелек базасы — 2810 мм, ал салмағы — 2075 келі. H7 Қазақстанда сатылып жатқан Haval Jolion және H6-дан үлкенірек болады. Кіру және шығу бұрышы — 20 және 23 градус. Автомобильдің төрт дизайн нұсқасы бар, 19 дюймдік дөңгелек дискісімен жабдықталады.
Күштік құрылымы 116 ат күшіне ие 1.5 литрлік атмосфералы моторға негізделгені белгілі. Ал аккумуляторы литий-темір-фосфаты болады. Басылым жаңа Haval H7 Қытайда 2023 жылы жарық көрген Xiaolong Max кроссоверінің түрленімі болады деп болжап отыр. H7 одан алдыңғы бөлігінің өзгеше дизайны және ерекше жарық техникасымен ерекшеленеді, бірақ моторы бірдей болуы мүмкін.
Haval Xiaolong Max 116 ат күшіне ие дәстүрлі мотор және екі электромотормен жүреді. Олардың жалпы қуаты — 279 ат күші мен 585 Нм. Машина 6.8 секундта жүзге дейін жылдамдық алады. Гибрид электр қуатымен 105 километр жол жүреді. Бірақ Haval H7-нің аккумулятор сыйымдылығы мен жүріс қоры жоғары болуы мүмкін. Марка кроссоверді биыл жыл аяғында немесе 2025 жылдың басында таныстырады.
Комментариев: 0