Haval Raptor-дың сырт пішіні өзгерді

Haval Raptor қазір Қытайда гибрид күштік құрылыммен ғана жүреді. Алда модельдің электрлі қондырғысы жоқ арзандау нұсқасы шығады. Қытай Өнеркәсіп министрлігінің сертификат туралы ақпаратына сүйенсек, Raptor басқа дизайнда жасалады.

Мекеме жариялаған суреттен кроссовердің «бет-бейнесі» айтарлықтай түрленгенін көруге болады, бампер мен капот қана бұрынғы қалпын сақтаған. Haval Raptor тік ламелі бар жаңа радиатор торымен ерекшеленеді, оның бірнеше түсі болады. Модель енді дөңгелек оптикамен емес, тікбұрышты шаммен жабдықталады.

Артқы шамы да басқаша, бесінші есікте қосалқы дөңгелекке арналған орын пайда болды. Жаңарған Raptor 18 немесе 19 дюймдік дөңгелек дискісімен жабдықталады.

Қазір кроссовер 383 ат күшіне ие бензинді мотор мен екі электромотордан тұратын Hi4 гибрид құрылыммен жүреді. Сертификат құжатына сай Raptor 238 ат күшін беретін 2 литрлік төрт цилиндрлі мотормен жабдықталады, ең жоғары жылдамдығы 200 км/сағ болады. Кроссовердің беріліс қорабы мен жетек түрі туралы ақпарат жоқ.

2 литрлік мотормен жүретін Raptor-дың ғана сырт пішіні өзгереді деген ақпарат бар. Демек клиенттер бір модельдің екі түрленімін оңай ажырата алады. Бірақ алдағы уақытта барлық «раптор» жаңа дизайнмен шығады. Өйткені қазір кроссовер қымбатырақ Haval H9-ды еске түсіреді.