Германиядағы ең көп сынатын көліктер рейтингі

Көлікті техникалық бақылау қызметі (TÜV) 2024 жылғы шілде мен 2025 жылғы маусым аралығында тексерістен өткен 9.5 млн машинаның нәтижесін жариялады. Жалпы көрсеткіш таңғаларлық емес, бірақ кейбір мәлімет назар аударуға тұрарлық.

Мысалы, 2–3 жыл бұрын шыққан электромобиль рейтингінде соңғы екі орын Tesla-ға тиесілі. Мамандар екі жыл қатарынан ең нашар автомобиль атанған әр 100 Model 3-тен 13.1 % ақау тапқан. Model Y кроссоверінің көрсеткіші тіпті нашар (17.3%).

Америкалық электромобильдің күштік құрылымында емес, аспа, тежеуіш және фара сияқты механикалық бөлшектерінде кемшілік кездеседі дейді Carscoops.

Бұл категорияда Mini Cooper SE-нің (3.5 %) сапасы жоғары. Сенімді электоркарлар тізіміне Audi Q4 e-tron (4%) және Fiat 500e (4.2 %) кірді.

Ұзақ пайдаланған кезде 5 және 6-сериялы BMW (4–5 және 8–9 жыл бұрын шыққан), Dacia Duster (6–7 және 10–11 жыл) және Renault Clio (12–13 жыл) жиі бұзылыпты. Volkswagen-нің Golf Variant, T-Roc (4–7 жыл) және ескі Touareg сияқты өнімдері үздік атанды. 2–3 жыл бұрын жарық көрген компакт-кластағы модельдер арасында Mazda 2 мен 1-сериялы BMW алда тұрса, орта көлемді седандар қатарында рейтингті Mercedes-Benz C-класc түйіндеді.

TÜV көп жыл өтсе де, сапасын жоғалтпаған машиналардың рейтингін жасады. Ол конвейерден түскеніне 10 жылдан асқан және қауіпсіздік жүйесіндегі ақауы аз автомобильдерді қамтыған. Бұлар сапа, төзімділік және жақсы техникалық сервистің символы саналады.

Беделді категорияда Mercedes-Benz (18.5 %) алтын жүлде алды, Audi (19.2 %) күмісті қанағат тұтса, Toyota (22 %) қоланы қанжығалады.

Қазақстанда жиі кездесетін 10–25 жыл бұрын шыққан көліктерді техникалық тексерістен өткізіп, осылай рейтинг жасаса қызық болар еді.