Жол ережесін жиі бұзатындардың көш басында АҚШ дипломаттары тұр. Германиялық Bild басылымы атап өткендей, Дональд Трамп президент болып сайланғаннан кейін олар тіпті есіріп кеткен ( екі жыл бұрын америкалықтар бесінші орында болатын). Ережені елемейтіндер тізімінде екінші орынға Грекия тұрақтаса, одан кейін Ресей, Йемен және Қазақстан тұр. 2018 жылы Берлин полициясы дипломаттардың 21 700 ЖҚЕ-ін бұзғанын анықтаған. Елшілердің қатысуымен болған 79 жол-көлік оқиғасы тіркеліпті. Мұндай апат салдарынан 27 адам жарақат алып, екеуінің халі тіпті мүшкіл болған екен. Сонымен қатар дипломатиялық нөмірі бар темір тұлпарлар 50 рет оқиға орнынан ізін суытыпты.
Елшіліктер мен консулдық қызметкерлерін көбіне дипломатиялық қол сұқпаушылық қорғайды екен.
ҚР Сыртқы істер министрлігіндегілер аталған антирейтинг жайлы білетіндерін және қазақстандық дипломаттардың жол ережесін өрескел бұзу деректері тіркелмегенін мәлімдеді. КТК телеарнасы хабарлағандай, еуропалық қалаларда тұрақ орындары тым аз болғандықтан, елшілік қызметкерлеріне көп жағдайда көлікті тұраққа қою ережесін бұзғаны үшін айыппұл салынатын көрінеді.
— Жол ережесін өрескел бұзған қызметкерді біз кері қайтарып, бірден жұмыстан босатамыз. Сонымен қатар, көпшілікті айыппұлдар мемлекет бюджетінен төлене ме деген сұрақтар мазалайды. Бұл ақпарат шындыққа жанаспайды. Жол ережесін бұзған әр дипломат айыппұлды өз қалтасынан төлейді, себебі ол мемлекет бюджетімен қарастырылмаған, — деді ҚР СІМ-нің ресми өкілі Айбек Смадияров.
Комментариев: 0