Geely Қазақстан нарығына жаңа кроссовер шығарады

Geely брендінің әлеуметтік желідегі парақшасында тизер жарияланды. Одан беймәлім машина мен «Жақында көкте жаңа жұлдыз жанады» деген жазу байқалады. Фото мен мәтіннен-ақ қатарға Starray кроссовері қосылатынын аңғаруға болады.

Қытайда Boyue L деген атаумен сатылатын модель «атластар» топтамасының жалғасы саналады. Жаһандық нарыққа шығару үшін атауын Starray деп өзгерткен. Жаңа машина басқалардан сырт пішінімен ғана емес, айрықша радиатор торымен, оптикасымен және техникалық бөліктерімен ерекшеленеді.

1 / 7

• 
• 
• 
• 
• 
• 
• 

1 / 7

Жаңа машина Geely мен Volvo бірлесіп жасаған CMA платформасына негізделеді. Сол себепті оны Tugella мен Mojaro-ның туысы десек артық етпейді. Өлшемі — 4670×1900×1705 мм, дөңгелек базасы — 2777 мм.

Кроссовер өз отанында бірнеше күштік құрылыммен сатылады. Boyue L 181 және 218 ат күшін беретін бензинді турбомотормен және 245 ат күшіне ие гибридпен жабдықталады. Ал экспортқа ең қуатты бензинді қозғалтқышпен ғана шығады. 2 литрлік мотор мен 7 сатылы робот 325-350 Нм момент береді. 8.2 секундта сағатына 100 шақырымға дейін жылдамдық алатын кроссовер тек алдыңғы жетекті болады.

1 / 10

• 
• 
• 
• 
• 
• 
• 
• 
• 
• 

1 / 10

Кувейтте саудаланып жатқан модельдің базалық жабдықтар тізімінде 18 дюймдік дөңгелек, толық диодты оптика, климат-бақылау, сонымен қатар 10.25 және 13.2 дюймдік екі экран тұрған медиажүйе бар.

Starray Қазақстанда Azkarra-ны алмастырады не осы модель мен қымбатырақ Tugella-ның арасынан орын алады деген болжам бар. Соңғысы рас болса, жаңа көліктің бағасы 16 млн теңге шамасында болады. Әзірше оның құны да, қашан саудаға түсетіні де белгісіз.