Geely Қытайда 2024 жылғы Icon кроссоверін саудаға шығарды. Онсыз да арзан бюджеттік кроссовер тағы арзандады.Енді атауында Butterfly қосымшасы бар нұсқа 96 900 юань (6 млн теңге) тұрады. Кроссоверге жаңа опциялар қосылды.
Машинаның сыртқы дизайны өзгермеді. Geely Icon дизайны дәстүрлі моторы бар Қытай көліктеріне тән емес, ол бүйіріндегі қатпарлармен, өзгеше радиатор торымен және ойық есік тұтқаларымен ерекшеленеді. Түс палитрасына ашық реңктер қосылды, ал шатырының контраст дизайны базалық жабдықтар тізіміне кірді.
Geely Icon Butterfly 10.25 және 12.3 дюймдік екі дисплейі бар медиажүйемен, Geely операциялық жүйесімен, дауысты көмекшімен және бет-әлпетті тану камерасымен жабдықталған. Орындықтары былғарымен қапталған және электрлі реттеледі. Қымбат нұсқаларда жүргізуші көмекшілерінің кешені, интернет, айнала шолу камерасы, 1.7 шаршы метр панорамалы люк, бесінші есік ашылғанда проектор экраны ретінде қызмет ететін жүксалғыш бөлігінің пердесі бар.
Өлшемдері — 4350×1815×1620 мм, дөңгелек базасы — 2640 мм. Автомобиль Қазақстандағы Geely Atlas-тан шамамен 300 мм кіші. Барлық үш комплектацияда кроссовер 181 ат күшін және 290 Нм момент беретін 1.5 литрлік турбомотормен, 7 сатылы роботпен жүреді. Icon алғашқы жүздікті 7.9 секундта еңсереді, ресми отын тұтыну мөлшері — 100 шақырымға 6.3 литр. Үздік комплектациядағы Geely Icon Butterfly 116 900 юань (7.15 млн теңге) тұрады.
Комментариев: 0