«Группа ГАЗ» жаңа материкке аяқ басқанын ресми мәлімдеді. Бастапқыда сатып алушыларға тек бір модель ұсынылады. Ол — бізге «ГАЗ Садко Next» атауымен таныс GAZ Trackmaster 4×4.
Аустралия тұрғындарына арналған машина атауын ғана емес, рөлін де ауыстырып, анағұрлым жақсы жабдықталған. Тізімде ауа баптағыш, медиажүйе, шноркель, шығыр мен 90 литрлік қосымша жанармай багы бар. Ал басқа жағынан «Трэкмастер» ресейлік бауырына ұқсайды.
Жүк көлігі 150 ат күшіне ие 4.4 литрлік ЯМЗ-534 турбодизелі арқылы қозғалады. 490 Нм момент дөңгелектерге 5 сатылы механика мен толық жетекті жүйе арқылы беріледі.
Үш орынды кабина мен борттық жүк платформасынан тұратын GAZ Trackmaster 4×4-тің бағасы 90 000 Аустралия долларынан (27.9 млн теңге) басталады. Ал Ресейде мұндай көлікті 19.5 млн теңгеге аласыз.
Trackmaster-ді Australian adventure vehicles 4×4 (AAV 4×4) компаниясы саудалайды. Мекеме басшысы Бретт Болтон жол талғамайтын машинаны саяхаттағанды ұнататын тұрғындар алады дейді, болашақта оны мемлекеттік ұйымдарға да ұсыну жоспарда бар.
әдемі