Формула жарысына қатысқан Mercedes-Benz сатылады

RM Sotheby’s аукцион үйі Mercedes-Benz-тің формула жарысы тарихындағы ең маңызды спорткарларының бірі болған автомобильді ашық саудаға қояды. W 196 R индексті бұл модель ерекше шанақ дизайнына байланысты Stromlinienwagen деп аталған. Брендке екі Гран-при жеңісін сыйлаған родстер 50 млн еуроға бағаланып отыр. Аукцион 1 ақпанда өтеді.

W 196 R спорткар топтамасын жасауға әйгілі инженер Рудольф Уленхаут жетекшілік еткен. Модель Формула-1-дің 1950 жылдардың басындағы жаңа техникалық регламентіне сай жасалған. Ол ереже шанақ құрылымына емес, қозғалтқыш көлеміне қатысты болды. Mercedes-Benz бір мотор (290 а.к; 2.5 л) жасап, W 196 R-дің әртүрлі трассаға арналған екі түрлі сырт пішінін әзірледі.

1 / 21

• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 
• 

1 / 21

Марка бұралаң трекке арналған W 196 R-ді дөңгелегі ашық дәстүрлі формада, ал жоғары жылдамдықты талап ететін автодромда жүретін машинаны минималистік дизайнда жасады. Ол үшін панельді салмағы жеңіл магний қорытпасынан әзірлеген. Мұндай Stromlinienwagen-нің ең жоғары жылдамдығы 300 км/сағ-қа жетеді.

1954 жылғы алғашқы формула маусымында неміс командасы көптеген жеңіске жетіп, W 196 R шассиінің артықшылығы анық көрінді. Сол жылы атақты шабандоз Хуан Мануэль Фанхио «Silver Arrows» сапында алғаш рет өнер көрсетті. Сатылатын экземпляр сол маусымның аяғында, желтоқсанда жасалған, 1955 жылы қаңтарда Фанхио осы шассимен Буэнос-Айресте топ жарды.

1 / 11

• 
• 
• 
• 
• 
• 
• 
• 
• 
• 
• 

1 / 11

Монцадағы жазғы Гран-при алдында зауыт командасына қосылған Стирлинг Мосс өтініші бойынша спорткардың шанағы өзгерді. Техникалық проблемаға байланысты ол жеңіске жете алған жоқ, бірақ Мосс сол Гран-приде ең жылдам айналым нәтижесін тіркеді.

Mercedes-Benz командасы жалпы 14 дана W 196 R шассиін жасаған, 1955 жылдың аяғында оны ғана қолданыста болды, ал олардың тек төртеуі Stromlinienwagen шанағында шықты. Машинаны фирма 1965 жылға дейін штаб-пәтерінде сақтап, кейін жаңа ашылған Индианаполистегі мұражайға сыйға тартыпты. Яғни, бұл W 196 R ешқашан саудаға түспеген, осы фактор коллекционерлерді қызықтыратыны анық.