Ford инженерлері жаяу жүргінші мен велосипедшіні ерте байқау үшін смартфон, Bluetooth және 5G қолдану мүмкіндігін қарастырып жатқанын Carscoops жазды. АҚШ-тың бірқатар ғылыми ұйымдарымен бірігіп зерттеу жүргізген автоөндіруші Bluetooth Low Energy протоколын пайдаланып, жақын маңда жүрген «фордтарға» мобильді құрылғының тұрған орнын көрсететін қосымша әзірледі.
Қосымша орнатылған смартфоннан хабар алған борткомпьютер жаяу адамды қағу қаупі төнгенін анықтап, апаттың алдын алуға күш салады немесе жүргізушіге ескертеді не апаттық тоқтау жүйесін іске қосады. Бұл әсіресе, жаяу жүргінші көрінбейтін аймақта тұрғанда немесе қараңғы уақытта аса маңызды. Сезгек қызметін атқаратын смартфондардың қозғалу жылдамдығы электроникаға жаяу адамды велосипедшіден ажыратуға мүмкіндік береді. Ал 5G желісі мәлімет беру жылдамдығын арттырады.
Комментариев: 0