2019 жылдан бері шығарылып келе жатқан «Эксплорердің» алтыншы буыны сұсты формасы мен толық жетекті болуына қарамастан, жол талғамайтын көлік емес. Ол кәдімгі толық өлшемді отбасылық кроссовер. Дегенмен модельдің атауы мен буын сабақтастығы (отыз жыл бұрын Bronco II-нің ізбасары ретінде жасалған) өндірушіге маза бермесе керек, стандарт модельден өзгерек Ford Explorer Timberline жарық көрді.
Timberline («орман шетінде» деп аударуға болады) табиғатқа шығуға бейімделген модель. Оған Torsen артқы дифференциалы мен толық жетекті трансмиссияның жеті жұмыс режимін таңдауға болатын Terrain Management System жүйесі орнатылған. Күшейтілген амортизатор мен серіппесі полиция қызметіндегі Explorer Interceptor-мен бірдей. Bridgestone Dueler P265/65 R18 шиналарының арқасында көліктің жерден биіктігі 221 мм-ге жетті.
Автокөліктің қозғалтқышы өзгеріссіз қалды. 304 ат күші мен 420 Нм момент беретін 2.3 литрлік турбомотор қойылған. Ол 10 сатылы автоматпен жұптасады. Артқы тіркеменің салмағы — 2.4 тонна. Стандарт жабдықтар тізімінде арақашықтықты сақтап, жол белгілері мен жолдағы кедергілерді қадағалайтын Co-Pilot360 және Co-Pilot360 Assist+ көмекшісі бар. Радиатор торына қосымша жарықдиодты күндізгі жарық шамдар орнатылған.
Ford Explorer Timberline өз елінде биыл жазда сатылымға шығады. Бағасы 47 мың доллардан басталады. Қазір Қазақстанда Ford бренді шығарылмайды.
Комментариев: 0