Бірнеше күн бұрын жарияланған екінші тоқсан есебі баға демпингі кезінде компанияның электромобиль арқылы қандай пайда тапқанын көрсетті деп жазды Carscoops. Мәліметтерді жинақтап, нәтиже нашар екенін көреміз.
Осы аралықта жаңа электромобиль өндірісіне жауапты бөлім 1.8 млрд доллар шығындапты, басқаша айтсақ, әр сатқан Mustang Mach-E мен F-150 Lightning-тен 32 мың доллар жоғалтқан. Себебі зауыт сәуір-маусым аралығында небәрі 34 000 батареялы модель өткізген, ал табыс табу үшін сатылған көлік саны 100 мыңнан кем болмауы керек.
Компания аналитиктерінің болжамына сүйенсек, жыл аяғына дейін көрсеткіш 4.5 миллиард долларға жетеді екен. Бұл Ford сияқты ірі марка үшін қатты соққы болмағанмен, едәуір зияны тиетіні анық. Компания тіпті жылдық жоспарын қайта қарады. Биыл 600 000 электромобиль шығармақ болған, енді бұл 2024 жылдың еншісіне қалды.
Форд концернінің гибрид пикаптары мен жол талғамайтын көліктеріне сұраныстың артуы және бәсекелестермен серіктестік орнату шығын мөлшерін азайтуға септігін тигізеді. Ford Тesla-ның стандарт суперчарджерлерін қолдануға келісті. Ел арасында бренд машиналарына Tesla-ның FSD автопилотын орнатады деген сыбыс тарады. Бірақ бұл тек болжам, себебі компанияның өзінде BlueCruise аталатын автономдық қозғалыс жүйесі бар.
Комментариев: 0