Ford алғаш рет «Дакарға» қатысады

Ford концерні әлемдегі ең әйгілі ралли-марафонға дайындық басталғанын хабарлады. Ranger Raptor-ға негізделген «Дакарға» арналған болид сынақтан өтіп жатыр. Команда жеңіске жетуге ниетті.

Ford командасы бұған дейін әлемдегі ең әйгілі жол талғамайтын жарысқа қатыспаған. Енді сол олқылықтың орны толады.

Концерн Baja 1000 ралли-рейді сияқты аймақтық жарыстарда бақ сынаған. Демек «Дакарға» арналған Ranger Raptor көлігін нөлден бастап жасамаған. Бірақ машина нақты қандай болатынын және сериялы нұсқасына қаншалық ұқсас екенін Ford хабарлаған жоқ.

Жарысқа арналған пикаптың моторы қарапайым Ranger Raptor агрегаты негізінде жасалуы мүмкін. Ол 400 ат күшіне ие 3 литрлік турбоүрлемді V6. Бірақ Shelby GT500 бен F-150 Raptor-дың 5.2 литрлік V8 моторы қойылуы да ғажап емес. Мұндай мотор 750 ат күшіне ие.

Болидті жасауға Ford-тың бұрынғы серіктесі M-Sport командасы атсалысады. Сондай-ақ оңтүстік африкалық Neil Woolridge Motorsport инженерлері бірге жұмыс істейді.

Жаңа «Раптор» 2025 жылғы «Дакарға» қатысады, ал 2024 жылдың басындағы жарыста команда Ranger моделінің алдыңғы буыны негізіндегі пикаппен бақ сынайды. Neil Woolridge Motorsport пен M-Sport автомобильді T1+ санатына арнап жасады.

Ford жеңіске жетуді жоспарлап отыр, бірақ алғашқы жарыс машина үшін де, команда үшін де қиын болатыны анық. «Дакар» 5 қаңтарда басталады, оған дейін Ranger Испаниядағы «Арагон» және Мароккода шілде және қазанда өтетін Rally du Maroc жарысына қатысады.