Кейде тюнерлердің ұшқыр қиялы күтпеген нәтижеге әкеледі. Мысалы, Финляндиядағы автомобиль сататын сайтта Rolls-Rover немесе Range-Royce деп атауға болатын техника саудаға шықты. Шын мәнінде ол — Rolls-Royce Cullinan-ның шанақ панелімен әрленген 2006 жылғы Range Rover Sport. Мамандар британиялық брендтің түпнұсқа компонентін пайдаланған.
Өзгеріс Cullinan-ның алдыңғы бөлігімен ғана шектелмейді. Жол талғамайтын көліктің экстерьеріне карбон элемент қосылған, тіпті капоты осы материалдан жасалған. Тюнерлер машинаны жаңа дөңгелек дискісімен жабдықтап, аспасын төмендеткен және шанағын Nissan Skyline GT-R гаммасындағы Midnight Purple түсіне бояған. Интерьері де назардан тыс қалмады, Tesla стиліндегі тік мультимедиа планшетін орнатып, әрлеу элементтерін жаңартқан.
Моторы стандарт күйінде қалды. Range Rover Sport 190 ат күшіне ие 2.7 литрлік дизельді агрегатпен жүреді, одометрі 304 мың шақырымды көрсетіп тұр.
Бұл ерекше жобаның бағасы – 21 000 еуро (11.5 млн теңге).
Комментариев: 0