Қазір спорткар мен суперкар өндірушілердің көбінің модельдер топтамасында кроссовер бар. Ferrari ұзақ уақыт бұл трендке қосылмаған еді, бірақ 2017 жылы ұстанымынан бас тартып, SUV керек деп шешті. Бес жылдан кейін Purosangue деп аталатын F175 индексті машинаны жұрт назарына ұсынды. Дегенмен Ferrari жаңа өнімді кроссовер деп атамайды. Purosangue — FUV (Ferrari Utility Vehicle).
Компания модельге арнап жаңа платформа әзірледі, ол бұған дейінгі толық жетекті GTC4Lusso-дан 5 % жеңіл болады.
Purosangue басты бәсекелесі Lamborghini Urus-тан едәуір кіші. Ұзындығы — 4973 мм, ені — 2028 мм, биіктігі — 1589 мм. Дегенмен Ferrari-дің дөңгелек базасы (3018 мм) «Ламбодан» (3002 мм) ұзын. Таза салмағы — 2033 кг, жабдықталғанан кейін — 2173 кг. Жүксалғыш көлемі — 487 литр.
Purosangue салоны GTC4Lusso сияқты төрт адамға арналған. Гранд турерден айырмашылығы кроссовер төрт есікті. Салондағы тағы бір өзгешелік — мультимедиа кешенінің 10.2 дюймдік экраны алдыңғы панель ортасына емес, жолаушының алдына орнатылған.
Purosangue бұған дейін Ferrari 812 Superfast-қа қойылған F140 индексті 6.5 литрлік V12-мен жүреді. Бірақ кроссовердегі агрегат қуаты 840-тан 725 күшке төмендеген. 716 Нм момент дөңгелектерге артқы осьтегі 8 сатылы робот арқылы беріледі. Көлік толық жетекті. Алдыңғы дөңгелектер 4RM жүйесінің көмегімен қозғалады.
![Ferrari Purosangue: заднепетельные двери и атмосферный V12](https://kolesa-photos.kcdn.online/kolesa-read/2ca71992f18589a5e4d01486e237947d5682591c-full.jpg)
Purosangue жүзге дейінгі жылдамдықты 3.3 секундта алады, ең жоғары жылдамдығы — 312 км/сағ. Ол Aston Martin DBX707 мен Lamborghini Urus Performante-ден жылдам.
Ferrari Purosangue 2023 жылы көктемде сатыла бастайды. Бағасы 390 мың еуродан басталады. Компания жоспарына сай кроссовер көптеп сатылып, марка өнімдерінің 20 %-ын құрайды. Бірақ Ferrari өндіріс көлемін арттырмайды.
Комментариев: 0