Exeed Қазақстандағы топтамасына гибрид қосатынын хабарлады. Брендтің біздің елдегі алғашқы бензинэлектрлі өнімі RX кроссовері болады.
Автомобиль 537 ат күшіне ие (650 Нм) күштік құрылыммен жүреді, ол 1.5 литрлік турбомотор, екі электромотор, үш сатылы DHT трансмиссиясы және 34.46 кВт·сағ CATL M3P батареясынан тұрады. Машина электр қуатымен 150 км (WLTP) жүре алады. Жалпы жүріс қоры 1100 км-ге жетеді.
Гибрид Exeed RX бензинді Premium-мен бірдей жабдықталған. Яғни машинаның жабдықтар тізімінде алдыңғы, бүйірлік, ортаңғы және тізеге арналған эйрбэг, қауіпсіздік пердесі, электрондық көмекшілер кешені, бейімді аспа, панорамалы шатыр, екі аймақты климат-бақылау, барлық орындықты жылыту және желдету функциясы, жүргізуші мен алдыңғы жолаушыға арналған массаж функциясы бар. Рөлді, алдыңғы әйнекті және айнаны жылытуға болады. Опциялар тізіміне сымсыз қуаттау, цифрлық аспаптар панелі, 12.3 дюймдік экраны мен 14 Sony динамигі бар медиакешен, проекциялық дисплей, бейнетіркеуіш, жүксалғыш есігінің электр жетегі, салонның атмосфералық жарығы және тағы басқалар кіреді.
Exeed RX PHEV-дің құны 26.1 млн теңгеден басталады. Демек ол модельдің ең қымбат түрленімі болады. Бензинді нұсқалары 21.9–25 млн теңге тұрады. Бірақ түрлі жеңілдіктерді есептегенде кроссовердің бағасы 19.3 млн теңгеге дейін, ал 2 литрлік турбомоторы бар Luxury комплектациясының құны 23 млн теңгеге дейін түседі.
Комментариев: 0