2021 жыл біздің автонарық үшін айтарлықтай жыл болады. Бұл жыл көлік тапшылығы және «қосымша жабдықтармен» ғана емес, қытайлық үш брендтің келуімен есте қалары сөзсіз. Алдымен Haval сатыла бастады, 10 желтоқсанда Chery нарыққа шығады. Ал жақында Orbis Auto дилерлері Chery-дің премиум суббренді Exeed-пен келісімшарт жасасты.
Exeed-тің негізгі бренді Chery «Астана Моторс» компаниясымен жұмыс істейді. Қытайлар бәрін бір қолға бермей, Қазақстандағы саудасын екі ірі компанияға тапсырып отыр.
Exeed топтамасы үш модельден тұрады: шағын LX кроссовері, орта көлемді TXL және үлкен VX. Ең арзан LX-тің бағасы 11 млн теңгеден басталады. Ал 2 литрлік турбомотор (249 ат күші) қойылған толық жетекті VX — бағасы 20 млн теңгеден жоғары алғашқы қытайлық көлік.
Exeed-тің алғашқы дилерлік орталықтары 2022 жылы наурызда ашылады. Олар Алматы, Нұр-Сұлтан, Қарағанды, Шымкент, Ақтөбе, Қостанай және Атырау сынды жеті қалада жұмыс істейді.
Exeed алғашқы бір жылда 1000 машина сатуды көздеп отыр, бұл Chery жоспарының (2022 жылы 3000 көлік) үштен біріне тең. Бұл меже нарық талабына сай келеді, елдегі көлік тапшылығына байланысты қытайлық машиналар жақсы сатылып жатыр. Бір жылға толмайтын уақытта Haval-дың мыңыншы көлігі иесін тапты. Ал елдегі ең танымал Қытай маркасы JAC биыл 11 айда 2500 машина өткізіп, тарихтағы ең үздік көрсеткішіне қол жеткізді.
Комментариев: 0