2017 жылдың 1 қаңтарынан сынақ зертханалары жедел қызметтерді шұғыл шақыру жүйесімен (ЭВАК) жабдықталмаған көліктерге көлік құралы конструкциясының қауіпсіздігі туралы куәлік беруден бас тартқан еді. Бұл орайда, олар аталған тыйымды салуда Техникалық реттеу және метрология Комитетінің Ұлттық аккредиттеу орталығының хатына сілтеме жасаған. Дегенмен, ЭВАК әлі іске қосылмаса да, әлден 244 өтініш беруші куәліктен қағылған. Алайда метрология мамандары одан әрі асып, 2016 жылдың 1 қаңтарынан берілген құжаттардың күшін жоюды жоспарлаған екен. Яғни, бұдан тағы 17 209 автокөлік иесі зардап шегуі мүмкін еді.
Қуанышқа орай, бұл жағдай республикалық көлік прокурорларының назарына ілікті. Заң қызметкерлері конструкция қауіпсіздігі жөнінде куәлік беруді тоқтату барысында, орталықтың өзіне берілген өкілеттікті асыра пайдаланғанын, және соның нәтижесінде азаматтардың өз мүлкін еркін пайдалану құқығын шектегенін анықтаған. Прокуролардың айтуынша, «Доңғалақты көлік құралдарының қауіпсіздігі туралы» Кеден одағы техникалық регламентінде шыныменде 2016 жылдың 1 қаңтарынан бастап Еуразиялық экономикалық одақ елдерінің аумағында шұғыл жедел қызметтерді шақыру құрылғыларымен жабдықталған көлік құралдарын айналымға енгізу туралы жазылған. Бірақ, ЭВАК жүйесі жоқ автокөліктерді кіргізуге тыйым салынбайды, себебі аталған құрылғылар сертификатталған дилерлік орталықтарда бастапқы есепке қойғанға дейін орнатылады.
Бас көлік прокуратурасының жазбаша нұсқауы бойынша, Ұлттық аккредиттеу орталығы заңсыз хатты кері қайтарды. Бүгінде куәліктер қайта беріле бастады.
Комментариев: 0