Еуропа Қытай көліктеріне қанша салық салатыны белгілі болды

Еурокомиссия Қытайдан кіретін электромобильге салатын кедендік салықты көбейтті. Шенділер әртүрлі бренд өніміне әртүрлі тариф белгіледі, ең жоғарысы 38.1 % болады. Билік бұл шара Еуропа нарығындағы бәсекелестікті жақсартатынын айтты. Ал Қытай Еуропаның бұл саясаты өндірушілердің жолын бөгей алмайды деп мәлімдеді.

Еуроодақ Қытай автоөндірушілері мемлекеттік субсидияға сүйеніп, ЕО-да тікелей демпингпен айналысып жатыр деп санайды, сол үшін кедендік салықты арттыруды шешті. Осыған байланысты Еурокомиссия тергеу жүргізіп, соның нәтижесінде жаңа алым мөлшерін белгіледі.

Мысалы, BYD электрокарына ең аз (17.4 %) салық салынады, өйткені ЕО тергеушілері концерн мен Қытай билігі арасындағы тікелей байланыс туралы дәлел таба алмаған. Geely өнімінің алым мөлшері 20 % болады (мұның да себебі сондай). Мемлекетпен жақын қатынастағы SAIC концернінің батареялы модельдерін Еуропаға жеткізу үшін 38.1 % салық төлеу керек, бұл ең жоғары тариф.

Еуроодақ тергеушілерімен жұмыс істеуден бас тартқан компанияларға да ең жоғары тариф белгіленді. Өзге марка өнімдеріне билік 21 % салық салады. Бұған дейін Еуропаға кіретін Қытай электрокарларына алым мөлшері 10 % болған.

Сондай-ақ жаңа тариф MG, Smart, Polestar және Lotus сияқты бұрын еуропалық өнім саналған маркаларға да әсер етеді. Қытайда шығатын Tesla электрокаларына да 21 % алым белгіленді. Бірақ Илон Масктың компаниясы Еурокомиссияға жеке экспертиза жүргізуге өтініш берді, соның нәтижесі бойынша алым сомасы өзгеруі мүмкін.

Шенділер Еуропаны Қытай электрокарларынан тазарту үшін емес (мысалы, АҚШ-тағы сияқты), нарықта барлық өндіруші үшін әділ бәсекелестік қалыптастыру мақсатында салық енгізгенін атап өтті. Қытай автоөндірушілер қауымдастығы жаңа алым экспансияны тоқтатпайтынын айтты, Еуропа нарығына интеграция жалғаса береді. Бірақ бұған дейін бірқатар Қытай маркасы Еуропа елдерінде көлік шығаруға дайындалып жатқанын хабарлаған.