Еуропа дәстүрлі қозғалтқыштан түбегейлі бас тартуға дайын емес

Reuters хабарлағандай, Еуропарламенттің ең ірі саяси тобы саналатын Еуропа халық партиясы (ЕХП) ЕО-ның жасыл стратегиясын қайта қарау қажет деп мәлімдейді. Саясаткерлердің пікірінше Еуропада іштен жанатын қозғалтқыштан 2035 жылға дейін толық бас тарту жоспары қазіргі жағдайды ескере отырып, қайта қаралуға тиіс.

Партия сұйық отын тұтынатын қозғалтқыш өндірісі 2035 жылдан кейін де жалғасуы керек дейді. Мысалы, олар өндірушілерге әртүрлі отын түріне бейімделген агрегаты бар машина сатуға рұқсат беруді ұсынып отыр. Шенеуніктер күштік құрылымның бір бөлігі болатын дәстүрлі моторы бар гибридтерді толық заңдастыруды қалайды.

Партия келер жылға жоспарланған экостандартты қайта қарауды талап етті. Автоөндірушілер қосымша шығындалады, ал Еуропа автоөнеркәсібі онсыз да қиын жағдайда.

Еуропада өндірушілер шығарынды деңгейі стандартқа сай келмейтін әр автомобиль үшін айыппұл төлейді. Reuters мәліметінше, Renault басшысы Лука де Мео Еуроодақтың қазіргі саясаты салдарынан индустрия шамамен 15 миллиард еуро санкцияға ұшырайды деп есептейді. Партия шектеуді жеңілдетуді немесе оны 2027 жылға дейін шегеруді ұсынғалы отыр.

Қазір көптеген еуропалық автоөндіруші шығынын азайту үшін төтенше шара қабылдауға мәжбүр, өйткені электромобильге салған инвестиция өзін ақтамады. Бірқатар компания табысы күрт азайғанын хабарлады, Volkswagen бірнеше зауытын жабуы мүмкін. Кейбір елдің үкіметі батареялы көлік нарығын субсидиялаудан бас тартып, жағдайды одан әрі ушықтырған. Қазанның ортасында Volkswagen басшылары жергілікті концерндер электромобиль саласына қарқын қосу үшін бар күшін салды, қалғаны саясаткерлерге байланысты деп мәлімдеді.