Еуроодақ дәстүрлі моторға тыйым салу жоспарын кейінге шегерді

Times газеті дереккөзіне сілтеме жасай отырып хабарлағандай, Еуроодақ жаңа автомобильге іштен жанатын қозғалтқыш орнатуға толық тыйым салу жоспарын 2035 жылдан 2040 жылға шегереді. Олар автоөндірушілер мен кәсіподақтар қысымын және қазіргі нарық жағдайын ескеріп, осындай шешім қабылдаған. Жаңа ереженің ресми мәтіні 17 желтоқсанда жарияланады деген ақпарат бар.

Еуроодақ бірнеше жылдан бері жергілікті автоөндірушілерді зиян газ шығаратын дәстүрлі мотордан бас тартуға мәжбүрлеуді жоспарлап келеді. Құжатқа бірнеше рет өзгеріс енді. Мысалы, жылына мың данадан аз машина шығаратын компаниялар мен синтетикалық отынмен жұмыс істейтін қозғалтқышқа жеңілдік жасалды. Бірақ ІЖҚ-ға толық тыйым салатын мерзім өзгермеген — 2035 жыл. Инсайдерлер Еурокомиссия сол мерзімді бес жылға шегеруге келісім бергенін хабарлады.

Бұл шешімге Германия билігі бастамашы болған-мыс. Олар неміс автокомпаниялары жабылып қала ма деп қауіптенеді. Электрокарға толық көшуге орасан зор инвестиция қажет, бірақ қазір Еуропада батареялы көліктердің саудасы ойдағыдай емес, бұл қарқынмен оған құйған қаражатты жақын арада қайтару қиын. Салдарынан ұлттық экономиканың негізгі тірегі саналатын автоөндірушілер үлкен шығынға ұшырап, жұмыссыздар көбеюі ықтимал.

Жаңа жоспарда гибрид автомобильдің қандай орын алатыны белгісіз, бірақ инсайдерлер бұл технологияға ерекше басымдық берілуі мүмкін екенін жоққа шығармайды.

Еуроодақ құрамына кірмейтін Ұлыбритания өз ойынан танбайды. Ел 2030 жылы автонарықтың 80 %-ы электромобиль, қалғаны гибрид болады деп есептеп отыр. Бірақ сала сарапшылары жергілікті стратегияны жаһандық бағытпен үйлестіру керек деген пікірде. Өйткені Британия ЕО және АҚШ-тан өзгеше әрекет етсе, елдегі автоөндірушілер ішкі нарыққа бөлек, экспортқа арнап бөлек модель шығаруға мәжбүр болады.