Еуро-7 талабы жұмсарады

Ұзақ пікірталастан кейін Еуроодақ министрлері 2027 жылы күшіне енетін Еуро-7 талаптарына өзгеріс енгізуге келісті. Ауыр жүк көлігі мен автобусқа қойылатын қатаң стандарт сақталады, бірақ кей көлік түріне жеңілдік жасалады. Бұл туралы Automotive News Europe хабарлады.

Stellantis және Volkswagen сияқты жетекші автоөндірушілер мен Франция, Италия, Чехия, Болгария, Венгрия, Польша, Румыния және Словакия сияқты ЕО елдерінің қарсылығына ұшыраған Брюссель қазіргі Еуро-6 стандартына үлкен өзгеріс енгізбеуге келісті.

Қабылданған шешімді енді ЕО Кеңесі, Еуропарламент және Еурокомиссия талқылап, қол қоюы қажет, бірақ бұл шешімнің мақұлданатынына күмән жоқ.

Еуро-7 стандартына қарсы адамдар өте ауыр экологиялық талап автоөндірушілер шығынын арттырып, өндірістің құлдырауына себеп болады деп есептейді. Бұл электромобиль өндірісіне бөлінетін инвестицияны азайтады.